‘‘อิธ ปน, ภิกฺขเว, เอกจฺจสฺส ทานมยํ ปุญฺญกิริยวตฺถุ อธิมตฺตํ กตํ โหติ, สีลมยํ ปุญฺญกิริยวตฺถุ อธิมตฺตํ กตํ โหติ, ภาวนามยํ ปุญฺญกิริยวตฺถุํ นาภิสมฺโภติฯ โส กายสฺส เภทา ปรํ มรณา นิมฺมานรตีนํ เทวานํ สหพฺยตํ อุปปชฺชติฯ ตตฺร, ภิกฺขเว, สุนิมฺมิโต เทวปุตฺโต ทานมยํ ปุญฺญกิริยวตฺถุํ อติเรกํ กริตฺวา, สีลมยํ ปุญฺญกิริยวตฺถุํ อติเรกํ กริตฺวา, นิมฺมานรตีเทเว ทสหิ ฐาเนหิ อธิคณฺหาติ – ทิพฺเพน อายุนา…เป.… ทิพฺเพหิ โผฏฺฐพฺเพหิฯ

‘‘อิธ ปน, ภิกฺขเว, เอกจฺจสฺส ทานมยํ ปุญฺญกิริยวตฺถุ อธิมตฺตํ กตํ โหติ, สีลมยํ ปุญฺญกิริยวตฺถุ อธิมตฺตํ กตํ โหติ, ภาวนามยํ ปุญฺญกิริยวตฺถุํ นาภิสมฺโภติฯ โส กายสฺส เภทา ปรํ มรณา ปรนิมฺมิตวสวตฺตีนํ เทวานํ สหพฺยตํ อุปปชฺชติฯ ตตฺร, ภิกฺขเว, วสวตฺตี เทวปุตฺโต ทานมยํ ปุญฺญกิริยวตฺถุํ อติเรกํ กริตฺวา, สีลมยํ ปุญฺญกิริยวตฺถุํ อติเรกํ กริตฺวา, ปรนิมฺมิตวสวตฺตีเทเว ทสหิ ฐาเนหิ อธิคณฺหาติ – ทิพฺเพน อายุนา, ทิพฺเพน วณฺเณน, ทิพฺเพน สุเขน, ทิพฺเพน ยเสน, ทิพฺเพน อาธิปเตยฺเยน, ทิพฺเพหิ รูเปหิ, ทิพฺเพหิ สทฺเทหิ, ทิพฺเพหิ คนฺเธหิ, ทิพฺเพหิ รเสหิ, ทิพฺเพหิ โผฏฺฐพฺเพหิฯ อิมานิ โข, ภิกฺขเว, ตีณิ ปุญฺญกิริยวตฺถูนี’’ติฯ ฉฏฺฐํฯ

7. สปฺปุริสทานสุตฺตํ

[37] ‘‘อฏฺฐิมานิ, ภิกฺขเว, สปฺปุริสทานานิฯ กตมานิ อฏฺฐ? สุจิํ เทติ, ปณีตํ เทติ, กาเลน เทติ, กปฺปิยํ เทติ, วิเจยฺย เทติ, อภิณฺหํ เทติ, ททํ จิตฺตํ ปสาเทติ, ทตฺวา อตฺตมโน โหติฯ อิมานิ โข, ภิกฺขเว, อฏฺฐ สปฺปุริสทานานี’’ติฯ

‘‘สุจิํ ปณีตํ กาเลน, กปฺปิยํ ปานโภชนํ;

อภิณฺหํ ททาติ ทานํ, สุเขตฺเตสุ [สุเขตฺเต (สี. ปี.)] พฺรหฺมจาริสุฯ

‘‘เนว [น จ (สี. ปี.)] วิปฺปฏิสาริสฺส, จชิตฺวา อามิสํ พหุํ;

เอวํ ทินฺนานิ ทานานิ, วณฺณยนฺติ วิปสฺสิโนฯ

‘‘เอวํ ยชิตฺวา เมธาวี, สทฺโธ มุตฺเตน เจตสา;

อพฺยาพชฺฌํ [อพฺยาปชฺฌํ (ก.) อ. นิ. 4.40; 6.37] สุขํ โลกํ, ปณฺฑิโต อุปปชฺชตี’’ติฯ สตฺตมํ;

8. สปฺปุริสสุตฺตํ

[38] ‘‘สปฺปุริโส , ภิกฺขเว, กุเล ชายมาโน พหุโน ชนสฺส อตฺถาย หิตาย สุขาย โหติ – มาตาปิตูนํ อตฺถาย หิตาย สุขาย โหติ, ปุตฺตทารสฺส อตฺถาย หิตาย สุขาย โหติ , ทาสกมฺมกรโปริสสฺส อตฺถาย หิตาย สุขาย โหติ, มิตฺตามจฺจานํ อตฺถาย หิตาย สุขาย โหติ, ปุพฺพเปตานํ อตฺถาย หิตาย สุขาย โหติ, รญฺโญ อตฺถาย หิตาย สุขาย โหติ, เทวตานํ อตฺถาย หิตาย สุขาย โหติ, สมณพฺราหฺมณานํ อตฺถาย หิตาย สุขาย โหติฯ

‘‘เสยฺยถาปิ, ภิกฺขเว, มหาเมโฆ สพฺพสสฺสานิ สมฺปาเทนฺโต พหุโน ชนสฺส อตฺถาย หิตาย สุขาย [หิตาย…เป.… (สฺยา. ก.)] โหติ; เอวเมวํ โข, ภิกฺขเว, สปฺปุริโส กุเล ชายมาโน พหุโน ชนสฺส อตฺถาย หิตาย สุขาย โหติ – มาตาปิตูนํ อตฺถาย หิตาย สุขาย โหติ, ปุตฺตทารสฺส อตฺถาย หิตาย สุขาย โหติ, ทาสกมฺมกรโปริสสฺส อตฺถาย หิตาย สุขาย โหติ, มิตฺตามจฺจานํ อตฺถาย หิตาย สุขาย โหติ, ปุพฺพเปตานํ อตฺถาย หิตาย สุขาย โหติ, รญฺโญ อตฺถาย หิตาย สุขาย โหติ, เทวตานํ อตฺถาย หิตาย สุขาย โหติ, สมณพฺราหฺมณานํ อตฺถาย หิตาย สุขาย โหตี’’ติฯ

‘‘พหูนํ [พหุนฺนํ (สี. ปี.)] วต อตฺถาย, สปฺปญฺโญ ฆรมาวสํ;

มาตรํ ปิตรํ ปุพฺเพ, รตฺตินฺทิวมตนฺทิโตฯ

‘‘ปูเชติ สหธมฺเมน, ปุพฺเพกตมนุสฺสรํ;

อนาคาเร ปพฺพชิเต, อปเจ พฺรหฺมจารโย [พฺรหฺมจาริโน (สฺยา.)]ฯ

‘‘นิวิฏฺฐสทฺโธ ปูเชติ, ญตฺวา ธมฺเม จ เปสโล [เปสเล (ก.)];

รญฺโญ หิโต เทวหิโต, ญาตีนํ สขินํ หิโตฯ

‘‘สพฺเพสํ [สพฺเพสุ (ก.)] โส [ส (สฺยา. ปี. ก.)] หิโต โหติ, สทฺธมฺเม สุปฺปติฏฺฐิโต;

วิเนยฺย มจฺเฉรมลํ, ส โลกํ ภชเต สิว’’นฺติฯ อฏฺฐมํ;